ABŞ İranın neft blokadasını ləğv edə bilər
ABŞ-nin İrana hərbi zərbələri təxirə salmasından sonra irəli sürülən yeni təklif nüvə danışıqlarının çərçivəsindən kənara çıxır və gərginliyin azaldılması üçün qarşılıqlı kompleks addımları nəzərdə tutur.
News24.az xəbər verir ki, bu barədə “Associated Press” agentliyi regional rəsmiyə istinadən məlumat yayıb.
Agentliyin məlumatına görə, təklifə Hörmüz boğazı vasitəsilə sərbəst gəmiçiliyin bərpası, həmçinin regionda, o cümlədən İranın dəstəklədiyi İraqdakı silahlı qruplaşmalar tərəfindən Körfəz ölkələri və İordaniyaya qarşı hücumların dayandırılması daxildir.
Mənbənin iddiasına görə, bunun müqabilində ABŞ İrana qarşı dəniz blokadasını dayandıracaq və Tehranın neft ixracını bərpa etməsinə imkan verəcək.
Mənbə vurğulayıb ki, bu şərtlərlə bağlı yekun razılıq hələ əldə olunmayıb.
Bununla belə, vasitəçilər sazişin hazırlanması istiqamətində işlərini davam etdirirlər.
