31 minlik stadionda heç 200 azarkeş də yoxdur - VİDEO

Misli Premyer Liqasının VI turu çərçivəsində bu gün keçirilən “Qarabağ” – “Şəfa” qarşılaşmasında tribunalardakı azarkeş sayı gözlənilənlərin qat-qat altında qalıb.

News24.az xəbər verir ki, hazırda davam edən matçda stadiona gələn izləyicilərin seyrəkliyi diqqətdən yayınmır.

Tofiq Bəhramov adına Respublika Stadionunda baş tutan qarşılaşmanı canlı olaraq tribunalardan izləyən futbolsevərlərin sayı hətta 200 nəfərə belə çatmır.

Xüsusilə diqqətçəkən və təəssüf doğuran məqam odur ki, Ağdam təmsilçisinin Avrokuboklarda keçirdiyi beynəlxalq matçlarda 31 mindən çox tamaşaçı tutumu olan arena tamamilə dolur və anşlaq yaşanır. Biletləri saatlar içində tükənən, böyük coşqu və izdihamla müşayiət olunan həmin beynəlxalq oyunlardan fərqli olaraq isə daxili çempionat qarşılaşmalarında analoji mənzərəni görmək təəssüf ki, mümkün olmur.

Ölkə futbolunun flaqmanı sayılan “Qarabağ”ın yerli liqa oyununda tribunalarda bu dərəcədə acınacaqlı boşluğun yaranması azarkeşlərin daxili çempionata olan marağının və davamiyyətinin növbəti dəfə ciddi şəkildə müzakirə mövzusuna çevrilməsinə səbəb olub. (Qafqazinfo)