Ukraynaya 10 “Patriot” raketi veriləcək? – ABŞ-dən qərar

ABŞ administrasiyası Almaniyada olan 10 ədəd MIM-104E GEM-T idarəolunan raket-tutucusunun Ukraynaya verilməsini təsdiqləməyə hazırdır.

News24.az xəbər verir ki, bu barədə ABŞ Dövlət Departamentinin Konqresə təqdim etdiyi bildirişdə qeyd olunub.

Sənədə əsasən, söhbət “Patriot” zenit-raket kompleksləri üçün nəzərdə tutulan və daha əvvəl Almaniyanın ABŞ-dan aldığı 10 ədəd MIM-104E GEM-T raketindən gedir. Onların ümumi dəyəri 29,6 milyon dollar qiymətləndirilir.

ABŞ-dan silah alan ölkələr Vaşinqtonun razılığı olmadan həmin silahları üçüncü tərəfə ötürə bilməzlər.

“Bu transfer ABŞ-nin təhlükəsizlik sahəsində yardım məqsədlərinə uyğundur. Birləşmiş Ştatlar hökuməti siyasi, hərbi və iqtisadi amilləri, eləcə də insan hüquqları və silahlara nəzarət məsələlərini nəzərə alaraq bu transferə icazə verməyə hazırdır”, – sənəddə bildirilib.

Dövlət Departamenti qeyd edib ki, Ukrayna hava hücumundan müdafiə imkanlarını gücləndirmək məqsədilə bu raketləri əldə etmək istəyir və artıq eyni tipli sursatlara malikdir.

Bildiriş avqustun 14-də ABŞ Konqresinə təqdim edilib. Qanunvericilər müəyyən edilmiş müddət ərzində sövdələşməyə etiraz etmədikləri halda raketlərin Ukraynaya verilməsi mümkün olacaq. (Report)