Aşura günü nəyi ifadə edir?

Müsəlman dünyasında xüsusi əhəmiyyət daşıyan günlərdən biri olan Aşura günü hər il Məhərrəm ayının 10-cu günündə qeyd olunur. Bu gün həm dini, həm də tarixi baxımdan fərqli mənalar daşıyır.
Bakupost.az xəbər verir ki, Aşura sözünün ərəb dilində “onuncu” mənasını verdiyi bildirilir. İslam tarixində bu gün xüsusilə Kərbəla döyüşü ilə əlaqələndirilir. 680-ci ildə baş verən Kərbəla hadisəsində İmam Hüseyn ibn Əli və onun tərəfdarları Əməvi hakimiyyətinə qarşı qarşıdurmada həyatlarını itiriblər. Bu hadisə İslam tarixində ədalət, haqq və zülmə qarşı mübarizə simvollarından biri kimi qəbul edilir. Aşura günü müxtəlif müsəlman icmalarında fərqli şəkildə yad olunur. Bəzi insanlar bu günü matəm və anım günü kimi keçirir, Kərbəla hadisəsini xatırlayır.
Digər tərəfdən, bəzi müsəlman ənənələrində Məhərrəm ayında oruc tutulması və ibadətə üstünlük verilməsi də qeyd olunur. Tarixi mənbələrdə Aşura gününün İslamdan əvvəl də müəyyən ənənələrlə əlaqəli olduğu göstərilib. İslamın ilk dövrlərində isə bu günün orucla bağlı xüsusi yeri olub. Azərbaycanda Aşura günü uzun əsrlərdir ki, xüsusi ehtiramla qeyd olunur. Müasir dövrdə Azərbaycanda bu günün qeyd edilməsi tamamilə sivil və mənəvi müstəviyə keçib. Qafqaz Müsəlmanları İdarəsinin (QMİ) çağırışları və cəmiyyətin maariflənməsi nəticəsində radikal, xurafata əsaslanan adətlər (bədənə xəsarət yetirmək, zəncir vurmaq) aradan qaldırılıb.
Bunun əvəzinə, Azərbaycanda Aşura günündə ən böyük ənənə qanvermə aksiyalarıdır. İnsanlar İmam Hüseynin adını bədənlərinə xəsarət vurmaqla deyil, ehtiyacı olan xəstələrə qan verib can qurtarmaqla anırlar. Bu, Aşuranın humanizm fəlsəfəsinə tam uyğun gələn ən gözəl nümunədir. Bu gün Aşura yalnız tarixi hadisənin xatırlanması deyil, həm də mənəvi dəyərlər, səbir, fədakarlıq, ədalət və inanc anlayışları üzərində düşünmək vaxtı kimi qiymətləndirilir.(sfera.az)